|
На 15 Јули 2011, во просториите на МОК, се одржa прес конференција по повод посетата на Претседателот на Египетскиот олимписки комитет, г-дин Махмуд Ахмед Али и Претседателот на Меѓународната ракометна федерација, г-динот Хасан Мустафа на Македонскиот олимписки комитет.
Претседателите на двата пријателски олимписки комитети разговараа за унапредување на соработката меѓу Македонскиот и Египетскиот олимписки комитет при што се договори и потпишување на Договор за соработка меѓу Македонија и Египет, на највисоко, олимписко, ниво.
Со ова нашите спортисти и тренери, во спортовите во кои Египет е светска сила ќе можат да соработуваат и да ги користат услугите на своите египетски колеги.
За време на состанокот имаше и презентација на кандидатурата на градот Александрија, кој е кандидат за град домаќин на Медитеранските игри 2017 година.
Оваа средба беше искористена и за разговор со Претседателот на Меѓународната ракометна федерација, г-динот Хасан Мустафа во насока на намерите на МОК, да го имаме првото учество на машката ракометна репрезентација на Олимписките игри во ЛОНДОН 2012.
Во тој контекст и претседателот на Ракометната федерација на Македонија, г-дин Михајло Михајловски се заблагодари на досегашната поддршка која МОК ја дава на РФМ, во надеж дека таа соработка ќе продолжи на највисоко можно ниво.
|